مش فاهم بصراحة.. ليه الخطاب السياسي “المتأسلم” دايمًا فظ وغليظ ومليان تجريح؟!أحمد الشرع “الجولاني” — المنتمي لجماعة إرهابية — طالع يقول إن دول الخليج، خصوصًا السعودية والإمارات وقطر ومعاهم تركيا، دول ناجحة ومتطورة.
كويس جدًا، رأيه وحرّ فيه، وفعلاً عندهم مقومات نجاح واضحة.
بس ليه يكمّل ويقول: «بعكس دول تانية زي مصر والعراق»؟
ليه الفجاجة دي؟
ده الأسلوب اللي متعودين عليه من الإسلاميين اللي فاكرين الوقاحة نوع من الصراحة!
فاكرين محمد مرسي لما طلع على الهوا وقال اسم قاضي ونعته بالمزوّر قدام الملايين؟!
رئيس جمهورية يعمل كده؟!
إزاي يفضح شخص من غير حكم قضائي ولا دليل؟
وبرضه محمود شعبان صاحب «هاتولي راجل»، اللي شتم الفنانة إلهام شاهين بألفاظ قذرة وقالها على الهوا: «كم رجل اعتلاكي؟»
ده الخطاب اللي بيقولوا عليه “إسلامي”؟
فين من قوله تعالى: «ولو كنت فظًا غليظ القلب لانفضوا من حولك»؟
الشرع النهارده بيغازل الدول اللي بتصرف عليه مليارات وبتدعمه سياسيًا، وده مفهوم.
لكن الغباء الحقيقي إنه يهاجم مصر ويسكت عن إسرائيل اللي بتضربه جوه بلده وما يقدرش يفتح بُقه!
كمصري، والله لا أتمنى لسوريا إلا كل الخير، بس ماينفعش أثق في حد بيحكم باسم الله وبيستخدم الدين كغطاء للمصلحة.
السعودية بتدعمه عشان تمنع تهريب الكبتاجون وتواجه النفوذ الإيراني.
قطر داخلة بالتمويل والإعمار عشان تضمن نفوذها.
تركيا عايزة تسيطر على شمال سوريا وتتحكم في الكرد.
والإمارات بتشتغل بالعقل والاستثمار، زي صفقة موانئ دبي بـ800 مليون دولار، لدمج سوريا في شبكاتها الاقتصادية وضمان نفوذها.
أما إسرائيل؟
دخلت الجنوب السوري، ووصلت جبل الشيخ، وقصفت مواقع الدولة وحتى القصر الرئاسي!
وبرغم ده كله، الجولاني بيقول: «ما استفزّناش إسرائيل، ومش عايزين حرب معاها»!
يعني تل أبيب تضربك وتسكت، لكن تهاجم مصر؟
هي دي الرجولة؟ ولا اللحية بتتهزّ بس لما ييجي سيرة مصر؟
للأسف، دي مش أول مرة نشوف متأسلم يشتم أو يطعن في أوطان الناس باسم الدين، وهو أول واحد باع بلده للممولين.
يا سيدي، الإسلام بريء منكم.
اللي بيحب وطنه ما يقللش من أوطان غيره، واللي بيحكم باسم الله لازم يخاف الله قبل ما يتكلم.
مصر ممكن تتعب أو تتأخر أحيانًا، لكن عمرها ما بتقع.
أما اللي باع صوته وكرامته، فحتى لو لبس عمامة، هيفضل تابع مش قائد.
