قالت وزارة الأوقاف، إن كل عمل شريف ورائه إنسان يبذل جهدا ويسعى لتوفير حياة كريمة لنفسه وأسرته.
الأوقاف: مش لازم يكون شغلك كبير في عيون الناس علشان يكون ليه قيمة.. المهم تكون بتعمله بإخلاص وإتقان
وقالت وزارة الأوقاف عبر صفحتها على فيسبوك: شرف العمل.. قيمتك في اللي بتقدمه، مش لازم يكون شغلك كبير في عيون الناس علشان يكون ليه قيمة.. المهم تكون بتعمله بإخلاص وإتقان.
وتابعت: كل عمل ومهنة شريفة وراها إنسان بيبذل جهد، وبيسعى يوفّر حياة كريمة لنفسه وأسرته، وبيقدم خدمة محتاجها غيره. علشان كده، ما تقللش أبدًا من قيمة شغلك، وما تخجلش من مهنة حلال؛ فالشرف مش في اسم الوظيفة، لكن في الأمانة والاجتهاد وإتقان العمل.
وواصلت الوزارة: سيدنا النبي ﷺ بيقول: «ما أكل أحد طعامًا قط خيرًا من أن يأكل من عمل يده، وإن نبي الله داود عليه السلام كان يأكل من عمل يده» رواه البخاري.
واستكملت: العمل وحده مش كفاية؛ المهم كمان نطوّر نفسنا ونتعلم باستمرار. العامل يتعلم مهارات جديدة، والموظف يحسّن أداءه، والشاب يتعلم حرفة أو يكتسب خبرة تساعده يلاقي فرصة مناسبة. فكل مهارة جديدة بتفتح باب، وكل خطوة في التعلم بتقربنا من مستقبل أفضل، وربنا سبحانه وتعالى بيقول: ﴿وَقُلْ رَبِّ زِدْنِي عِلْمًا﴾ [طه: ١١٤].
وأضافت الأوقاف: لما نجمع بين العمل والعلم والإتقان، نقدر نقدم حاجة نافعة؛ فمش كل إنجاز لازم يكون مشروع كبير أو مصنع ضخم. ممكن يكون درس يفتّح عقل طالب، أو محصول ينفع الناس، أو منتج متقن، أو فكرة توفر وقت وجهد، أو مشروع يوفر فرصة عمل.
واختتمت: الأجمل إن الإنسان لما يخلص في شغله، ويطلب الحلال، وينفع الناس، يكون جمع بين السعي في الدنيا وابتغاء الأجر عند الله، ابدأ من مكانك، وقدّر شغلك، وطوّر مهاراتك، وأتقن اللي في إيدك. فالأوطان بتتبني بسواعد أبنائها، وكل عمل شريف يُؤدَّى بأمانة هو خطوة في طريق البناء والتقدم.
