كتبت/ إيمان جوده
الإنسان بيتعلم من المعاملة، والتغيير مش دايمًا بيكون انتقام، بالعكس… أحيانًا بيكون ببساطة حماية للنفس.
الثقة الزيادة بتوجع، ولما الثقة تتكسر، مش بسهولة الإنسان يرجع زي الأول. مش لأن القلب قاسي، لكن لأن الإحساس بالأمان لما يتهز، بيخلّي الواحد يعيد حساباته في كل حاجة.
وعشان كده، قبل ما تسألني: «إنتِ اتغيرتي ليه؟
اسأل نفسك الأول:
إنت عملت إيه خلاني أتغير؟
إنت قلت إيه خلاني أراجع حساباتي؟
إنت عملت إيه خلاني أفقد الأمان اللي كنت حاساه معاك؟
لأن التغيير مش دايمًا بيكون اختيار…
أحيانًا بيكون رد فعل على مواقف، وكلام، ومعاملات، وحاجات صغيرة بتتراكم لحد ما الإنسان يوصل لمرحلة ما يقدرش يكمل بنفس الطريقة.
وعمومًا، أنا مش بزعل من الناس اللي بتتغير…
أنا بزعل لما أكتشف إن الصورة الحلوة اللي رسمتها في خيالي لشخص، كانت أجمل بكتير من حقيقته.
يمكن علشان كده لما لقيتني اتغيرت، ما تستغربش…
أنا ما بدأتش التغيير، أنا بس وصلت لمرحلة بطلت أدي أكتر ما باخد.
بطلت أجري ورا الاهتمام،
وبطلت أطلب التقدير،
وبطلت أشرح إحساسي كل مرة.
مش قسوة…
ومش غرور…
ومش انتقام.
دي بس حدود جديدة رسمتها علشان أحافظ على نفسي.
فلو لقيتني مش زي الأول…
افتكر إن أنا كنت زي الأول طول ما المعاملة كانت زي الأول.
